لاحت ابروقه وساق الليل طاري ( مدح )
اهداء الى الاستاذ / خالد عبدالرحمن الدوسري ( ابونايف )
لاحت ابروقه .. وساق الليل طاري
والشعر لا لاحت بروقة .. سريته
لا نويت القاف محتجت استشاري
جت تهافتني الاصايل مستميته
كن صدري معركة ذات الصواري
تسمع اقراع الحديد .. اليا بديته
ابدعه واغرف من بحوره واماري
وانتقي صافيه وانخل ما انتقيته
اسرق اللولو من عيون المحاري
وانسج خيوط الفكر واشيد بيته
ما جنيته صدق ، ما كان اختياري
اختياري .. فالحقيقه ما جنيته
اسري لوحدي بعثرات الغداري
العمر يسري ونا بحلمي سريته
اتصوّر هو متى وقت احتضاري
ساعة فيها يجيني ما اختشيته
ساعة الفرقى على قلب المداري
وقعها فالجوف ماظني قويته
القفص يحلى بـجوزين الكناري
روحهم واصواتهم هو ما شقيته
تغسل الامطار ماحدثه الغباري
والشجر ما يثمر الا .. لا سقيته
للاكارم جيت باحساس ووقاري
قاصد اللي لا دعا الداعي نصيته
يا سلام الله عدد رمل الصحاري
من خفوق محب ياقف لا دعيته
حافظً ودّك مثل حفظ البخاري
للاحاديث الصحيحه و المقيته
يالعديم اللي من نيوب الضواري
انتزع قسمه بكفه قبل صيته ..!
خالد الفعل الوفي قبل الاداري
لو اعيش العمر كله ما نسيته
ينتخيني واقبل بوجهي واداري
وان جفاني قل جيته وانتخيته
اختبرني بالوفا وكان انتصاري
اختباري وادري اني اجتزيته
لاقبلن المعسرات وجيت ساري
لو حياة المرء تفدا ل افتديته
يابونايف جيتك بشعري اواري
كل ما عندي وهذا اللي عنيته
وقفتك تسوى كثير وانت داري
عن غلاك اللي وسط عيني قريته
بعتذر لك كان تسمح باعتذاري
واسبيحك عن خطاي اللي خطيته
يزيد بن شغرود القحطاني
تعليقات
إرسال تعليق